الحب و الحزن

السلام عليكم و رحمة الله و بركاته

بعرف إنى بحب بجد لما بأبكى بجد .. لما ياخدنى حبيبى فى حضنه و أدارى دموعى فيه لما يمسح بإيديه على شعرى و مع كل مسحة يمسح معاها آلاف الهموم أشوفها بتقع قدامى و بتتكسر و بتختفى

بعرف انى بحب بجد لما أحتاجله قوى و أحس انه بعيد و إنى نفسى أجرى عليه أدور على أى طيف يوصلنى بيه

بعرف إنى بحب بجد لما أحس إنه أقرب لى من نفسى برغم إنه بالفعل أبعد عنى من القمر

النهارده بس حسيت كلمات كاظم لما غنى و قال

علمنى حبك أن أحزن و أنا محتاج منذ عصور لإمرأة تجعلنى أحزن لإمرأة تجعلنى أبكى فوق ذراعيها مثل العصفور

لإمرأة تجمع أجزائى كشظايا البلور المكسور

مش عارفة إيه الإرتباط بين الحزن و الحب لكن يمكن لإن الحزن هو من أقوى المشاعر اللى بنحتاج فيها نحس بالحب و الحب هو الحاجة الوحيدة اللى ممكن تقدر على الحزن

يمكن لإنه بيكون زى المرايه اللى بتورينا نفسنا و بتورينا الطرف الآخر و بتبين معاها كل المشاعر زى البلورات الشفافة من غير أى لون و لا رواسب

و يمكن كمان لإننا كل ما بنحب أكتر بنخاف أكتر لنفقد أجمل إحساس ممكن نعيشه و الحزن دايما رفيق الخوف